تكوني او لا تكوني (انتى وظروفك يا اوختشي)

انك تنتمي للجنس اللطشيف او الناعم او نون النسوة او إلى الستات ده شئ عظيم في حد ذاته ومقرف في حد ذاته لو حظك الهباب رماكي في مجتمع مهبب منيل شايفك كائن تابع .. ناس كتير هيدخل في دماغهم انى بنادي لأنحلال المرأة واول مثال هيجي في دماغهم علياء المهدي .. احب اقول لمعاليكم ان امثالكم هما اللي عملو لأمثالها قيمة :) .. البنت بتتربى على انها كائن ضعيف لازم قبل ما تهرش حتى تاخد رأي ابوها وتستأذن امها وتفكر في نظرة عمو برعي البواب وعم حسن البقال وخالتشي ام مدحت جارتهم في الشارع اللي وراهم .. دي مش مبالغة :) في ايام ثانوي مكنتش بروح المدرسة عشان ملهاش لازمة وجالي انذار بالفصل ودة الروتيني اللي مش روتيني انه يجي عند المنجد اللي تحت بيتنا ويوصلهولي عم حسين خادم الجامع واللي عينه تتدب فيها رصاصة على فكرة :) ، يومها فاكرة ان عم حسين قرر انه يدي الجواب لماما ولماما فقط قال يعني قفش عليا نصيبة كان بودي اقوله وانتا مال اهلك ؟!!! هع كوميديا سوداء ، عشان تاخدي قرار انك تخرجي مع صحباتك :) حتى لو في بيتهم لازم جدول مواعيد ساعة الوصول وساعة المرواح ولوقررتي انك تخرجي تبقى مصيبة سودا لو مقولتلهوش قبل اصلا ما تتفقي مع اصحابك!! اها لما انتى مقررة يبقا ايه لازمتى؟!! حتى في الجواز رأيك هامشي والتعميم مرفوض .. لو خلفتي ولد انتى اللي بتربيه على انه راجل ومسئول عن اخته!! طب واخته؟ مالهاش لازمة ؟ متعرفش تاخد قراراتها لوحدها ليه؟ ربيها عالاستقلالية وتحمل المسئولية سلحيها بالدين والاخلاق ومتقلقيش عليها لما تحتاج مساعدة هترجعلك انتى او اخوها ... وبتربي ابنك على انه هيبقى راجل البيت فتتعبي وتسهرى وتكبري وتخليه راجل ولما يكبر هيعلي صوته عليكي وهيمشي في دماغه عشان هو اللي راجل مش انتى دة لو اخد رأيك اصلا.... قبل ما تفكري تاخدي اي قرار او تعملي اى حاجة فكري في رأي امك وابوكي وخطيبك واخوكي وعم ابراهيم البقال وعم حسين خادم الجامع وعم ناصر البواب وعم ياسر اللي فاتح مكتبة تحت بيتكو ،و الست ام عنايات جارتكو وام فتكات مرات عم ابو اللي جابت ابن عم خالتك من ام تانية :)>>> شايفنى مأفورة؟ طب خد عندك تبقى بتشتغل ليل نهار وهي اللي فاتحة البيت وفي الحارة يعايروه انه تربية نسوان!!! وعلى فكرة ده شرف ليه 

بتعملي حاجة عيب؟ لأ
بتعملي حاجة حرام؟ لأ
خلاص يبقا طظ في اى حاجة