الشهادة والشغل دونت ميكس

بلد بتاعة شهادت صحييييييييح!!! حاجة بتشي كلب اوي بجد يعني الواحد يضيع من عمره 18 سنة فقط في تحصيل الشهادات وتجميعها ولو الديكور يسمح بيعلقها في الصالون.. شهادة الابتدائية ثم الاعدادية ثم الثانوية ثم الجامعية ثم يدخل على المستوى التاني ويبتدي يلم في شهادات الكورسات وكل ده عشان يقابل الوحش في الآخر (الشغل يعني) ... كام واحد استفاد من التعليم اللي قبل الجامعي!! غير الشهادات الورق يعني !! وحتى الجامعة بتتخرج وبتاخد كورسات عشان شهادتك لوحدها مو كفاية .. عشان تاخد كورسات لازمك فلوس كتير وعشان يبقى معاك فلوس لازم تشتغل عشان تجيبها وعشان تشتغل لازم كورسات انها الدائرة المفرغة للفراغ.. انا بتكلم عن الناس اللي بالعافية اهاليها قدرت تصرف عليهم لحد الجامعة.. اما لو كنت من ولاد الاغنيا بلا حسد يعني :) فإنت لازمك سنتين عشان تاخد كورسات تؤهلك (للبحث) بقلب جامد عن وظيفة تقدر تعيش منها وهو العمر فيه كام سنتين وياترى لو عاوز تتجوز هتلاقي فين الاسرة الاصيلة اللي تصبر عليك!! ما علينا ! نيجي بقا لسؤال الوجودي هل شهاداتك هي معيار لكفاءتك؟ يعني هل كونك معاك شهادات كتير ده بالضرورة معناه انك كفء؟! الكفاءة بتيجي بالممارسة والممارسة بتيجي بانك تشتغل وده بيخلي عندك خبرة !! طب الحل ايه !! قبل ما اقول الحل من وجهة نظري هقول مثالين من ارض الواقع المحيط بيا..
المثال الأول: صاحبتي خريجة جغرافيا زي حالاتي اخرة مالفت ودارت عالمدارس الخاصة اتقبلت في مدرسة خاصة كمدرسة (علوم) اه علوم وهي خريجة آداب جغرافيا والمعجزة التانية ان اول مرتب ليها كان 150 جنيييييه :) والحمد لله زاد جدا ووصل ل 250 حتة واحدة :).. اي كلام في الحمادة .. وعلى فكرة حظها كان حلو جدا غير انها عرفت تشتغل انهم شغلوها مدرسة :) هقولكم ليه عشان المثال التاني : صاحبتى التانية اسمها هبة النيل محمود بنوتة خريجة آداب جغرافيا وبتحضر ماجيستير وماشاء الله عندها حوالي 3 براءات اختراع واخدت المركز الاول في مسابقة محاكاة جائزة نوبل في مجال الابحاث التنموية آنسة هبة مش لاقية شغل :) وراحت كذا مدرسة والحمد لله مدرسة منهم وافقت وكلمتها وقالولها تعالي اشتغلي بس مفيش مكان فاضي غير انك تشتغلي مشرفة كانتين !!! اها حقيقي تبيع مصاصات وشيبسيهات للعيال !! مع احترامي للمهنة ... 

الحل بقا ايه!!

1. ننسف خالص نظام التعليم الأهبل من الكي جي لحد الثانوي
2. نبتدي على نضافة نقسم الاطفال حسب ميولهم وقدراتهم الذهنية وننمي عندهم المواهب
3. المدرسين كلهم لازم ياخدو دورات في كيفية التعامل نفسياً مع الاطفال.
4. جعل المواد كلها تطبيقية عملية هتقولي طب والنظري زي الدين! هقولك الدين معاملة .. يعني مثلا درس في الدين عن بر الوالدين تعمل حفلة في المدرسة لأولياء الأمور وكل طفل يقدم حاجة لأبوه او امه تعبيراً عن حبه ليهم او مثلا يعتذرلهم بشكل علني عن غلطة عملها زعلتهم منه. ولو مثلا عن البر باليتيم يبقى ننظم رحلة لدار ايتام والاطفال يتعرفوا على معاناتهم ويكونوا معاهم صداقات. وهكذا هتلاقي الطفل فاهم جوهر الدين مش حافظ عشان ميطلعش حمار اى حد يقوله اى حاجة ويلزقها في الدين ويصدقه. 
5. العيال هيطلعوا متخصصين جاهز وعندهم خبرة بطول الفترة اللى اتعلموا فيها بشكل عملي مفيد يعني مثلا الطفل اللي بيحب الكومبيوتر تنمى عنده الحب ده وتعرفه معلومات لو درس حاجة بيحبها مش هيبقى بيتعلم هيبقى بيستمتع واهله مش هيبقوا مضطرين انه كل شوية يقولو قوم ذاكر ياحمادة !!! وهكذا برضه.

الاطفال ثروة قومية وهما اللي بيحددوا شكل البلد دي بعد 100 سنة قدام متستناش حاجة من عيل اتربى على انه يسمع اوكا واورتيجا والمهرجانات وافلام السبكي وانه يبقى طفل استهلاكي مبيشغلش دماغه .. حصلت معايا قبل كدة وطفل قاللي فيها ايه يعني لما اسرائيل تاخد سيناء ماهي مصر واسعة !!! اتصدمت حضرتك؟!! طويب ادي عينة ولو عاوز عينات تانية اقف قدام اى مدرسة ابتدائي وشوف العيال اللي خارجة الفاظها ازاى وكلامها ايه هتعرف مصر شكلها ازاى بعد 10 سنين!!