من واقع تعاملي مع مجتمعى المحيط اتصدمت الحقيقة :) ، طب وايه الجديد هي الحياه ايه اصلا غير شوية صدمات وخوازيق فوق بعض ، لقد اكتشفت عدة حاجات كدة
سيبك بقا من كدبة مجتمع متدين بطبعه عشان متضحكش عليك الناس عشان احنا مجتمع ماشي بالمظاهر اى واحد بدقن يبقى شيخ حتى لو مربيها عفانة وكل الناس عارفة انه واطي .. اى حد لابس بدلة يبقى باشا حتى لو عالحديدة ، اى بنت مش محجبة تبقى حاجة من الاتنين يا مسيحية يا مش متربية يا اما من مكان تسكنه الطبقة العليا اللي معاها فلوس يعني هنا اللي بيحدد الطبقة بتاعتك هو الفلوس مش اخلاق ولا تدين :) وفي حالة انها مسيحية بيتبصلها بقرف ساعات كتير عشان بس مختلفة عن دين اغلبية الدولة بغض النظر بقا اللي بتقرف منها دي انسانة زيك زيها او انها ممكن تكون اخلاقها احسن منك او عندها انسانية انتا محروم منها دي حاجة تانية واصلا ممكن تكون انتا مبتصليش ولا بتصوم بس بتتعامل مع المختلفين عن ديانتك بازدراء وده على فكرة بيسئ لدينك اللي انتا هاجره اساساً موضوع لعنصرية الدينية دة اتهرس في ميت حاجة قبل كدة الحمد لله عندنا عشروميت نوع تاني عندك العنصرية بين الولد والبنت وتفضيل انجاب الذكور عن الاناث والمعاملة بينهم بقا على انك راجل وتحميها والكلام الهري ده بقول هري ليه عشان الواقع بيبقى غير كدة الولد بيتربي على انه يدخل في مسابقات مين يوقع بنات اكتر ومين يبقى عنده كذا واحدة كانه بيجمع البوكيمون او بيصطاد سمك وده في حد ذاته اهانة لمكانة البنت اللي لما تكبر هتكون ام عياله وللاسف هي كمان بتربي ابنها على انه يطلع زي ابوه لما كان صغير ومحدش بقا يجيبلي سيرة المتدين بطبعه اقل راجل لما بيجي يتجوز بيكون عامل علاقات مشكلة مع البنات من وهو في اعدادي وبيروح ياخد واحدة ويشترط انها متكونش لافة ولا عندها تجارب هيهيهي قطة مغمضة ومحدش يسألنى بيعرف منين عشان ساعتها الجزاء بيبقى من جنس العمل وكله بيلعب على كله اللي بيعمل نفسه مفتح وفاكر نفسه ذكي بياخد احلى قلم في حياته ان مكانش اترديتله في مراته هتترد في بنته او ابنه اصل ربك مبيسيبش مظلوم من غير مايجيبله حقه ، فكك من ان كمان المجتمع المتدين بطبعه بيحمي المتحرش والمغتصب وبيلوم الضحية ، بيفضل يحقر في المرأة لحد ان المرأة بقت بتحقر من نفسها وجنسها اوتوماتيك فخلاص مش محتاجين رجالة تزدري الستات هما بقو يعرفوا يزدرو نفسهم بنفسهم وعاوزين تتأكدو من كلامى اسألو اى حد بيركب مترو في مصر عن عربية الستات وموقف الستات لما واحدة تعترض على ركوب راجل في عربية مخصصة للسيدات :) ، نيجي بقا للهجات والاعراق واللون القاهراوي بيقول نكت سخيفة عالصعيدي والصعيدي يطلع عالبورسعيدي واللي من مدينة نصر يزدري اللي في الدويقة والغني يزدري الفقير والفقير يحقد عالغني ونكت عالدمايطة والمنايفة وكله كوووم والنوبيين كوم تاني كمية العنصرية عالنوبيين اللي يتقاله يا بكار والي يتشك في مجرد انتمائه لمصر وابيض واسود وكاروهات وقرف السنين بقا... الانسانية قدامها كتير عشان تنزل في مجتمعنا او تتزرع فينا وعلى فكرة مظنش ان في قانون ضد العنصرية وازدراء الانسان ياراجل ده احنا وصلنا لقاع الحضيض انتا متخيل ازدراء الانسان وصل لايه؟ وصل ان فوق ال50 طفل وحط تحت طفل مليووون خط اتدهسوا في حادثة قطر ورئيس جمهوريتك طلع قال بعزيهم وهاديهم عالراس بالصلاه عالنبي كدة 5000 جنيه يعني ابنك مات هتاخد مكانه 5000 جنيه حتة واحدة اتبسط بقا وهحاسب المسئول وادي وش قدرة الفول احنا بقينا خلاص الانسان بالنسبالنا حياته ارخص من علبة كبريت او عاملة زي عود الكبريت من غير علبة يعني مالهاش اي لازمة ، ازدراء الانسان المصري يلاحقه منذ الولادة حتى القبر ، من اول ما بتتولد لو اهلك معاهم فلوس بتتولد في مستشفى عدلة ورعاية وصحة وكل اللي انتا عاوزه ولو اهلك معاهمش مبتتولدش في مستشفى ولو اتولدت فيها مبتاخدش رعاية عدلة واحتمال الحضانة تنقلك مرض او تولع بيك اه والله حصلت كتير ان حضانات ولعت بأطفال بسبب الاهمال ، وياسلام لو حظك الاسود خلاك ضمن عيلة كبيرة معهاش فلوس ممكن عيلتك تتضطر تبيعك عشان تأكل اخواتك وفعلا حصلت وفي الحالة دي يا تتباع قطع غيار يا تروح لأسرة وانتا ونصيبك او تكبر وتبقى من اطفال الشوارع وممكن كطفل شوارع تتضطر تبيع دمك او كليتك وحصل قبل كدة طفل باع كليته بخمسين جنيه .. اه وربنا ... ولو اهلك متوسطين هتدخل مدارس حكومة وهتتكربسوا فوق بعض 70 طفل في الفصل وقابلني لو فهمت حاجة هتتعب مش هتلاقي علاج الا بالفلوس او تموت ولو مت واتدفنت مش بعيد المجاري تتطفح فوق تربتك وعادي جدا اصلك مش مدفون في مدافن اكتوبر انتا في البساتين وباب الوزير... عرفت بقا انك بيتم ازدراء انسانيتك من اول ما تتولد ولحد ماتموت وحتى وانتا مدفون... ايه شايفنى مغمقاها .. احب اقول لسيادتك ولا تضايق نفسك هات المسلسلات اللي فيها الناس عايشة في قصور والديكورات ايه بقا وللا هات الاعلانات اللي فيها البنات والولاد لابسين ماركات واقنع نفسك انى كدابة ... اضحك على نفسك وعيش بضمير مرتاح... بس نصيحة خلى تربتك في اكتوبر عشان متبوش او تدوب في مية المجاري اللي في باب الوزير
ليست هناك تعليقات:
إرسال تعليق