يسقط الاستقلال !

ايوة العنوان صح... و لأ مش سياسة (يجعل كلامنا خفيف)

الاستقلال هو ان يكون ليك رأي وقرارات واخدها بنفسك ولنفسك من غير ما حد يأثر عليك او يتدخل فيها ويعمل بورم وده طبعا مش عندنا خالص...

يسقط الاستقلال 

هنزل بحتة اعلانات شوية :

يسقط الاستقلال ... شعار يرفعه المجتمع المصري والعربي 

يسقط الاستقلال.... وازاي يكونلك رأي وحرية من غير ما ننغص عليك عيشتك

يسقط الاستقلال... العادات والتقاليد من صميمها ان محدش يسيب حد في حاله وده من صميم الترابط المجتمعي والسبب الأول والأخير في العقد والكلاكيع والمصدر الأول لرزق الدكاترة النفساويين.

يسقط الاستقلال... عشان كل واحد لازم يكون في حال اللي جنبه 

يسقط الاستقلال.... عشان لازم تعيش جوة الدايرة اللي بيرسمهالك اي حد في حياتك من القريب للغريب من اول امك وابوك /كي  لحد البواب وعياله من بعده.

يسقط الاستقلال... عشان لازم تعيش وتموت زي اللي عاشوا وماتوا اصلها "سنة الحياة" طب ماهي سُنّة حياتهم همّا اللي قرروها همّا وعاشواها هُمّا  وخلصنا وخلصوا واحنا اللي عايشين وهما ماتوا !!! لأ مفيش كدة هي سنة حياة واحدة فري سايز "تمشي لكل المقاسات يعني" 

وهنا اعزائي وعزيزاتي انتهت الفقرة الاعلانية ... اللي بعده

لأه تيرارارارا

لأ ... هذا الحرف اللعين مفتاح التمرد والشيطان والانحيراف والبكيني 

ذلك الحرف سيء السمعة واللي لازم تتبرأ منه اللغة العربية واخواته الحروف يطردوه من البيت ومجمع اللغة يعلنه ابنًا غير شرعي أو غير مستحمي للغة العربية الرصينة.

لأ ... الحرف اللعين الذي احاطت به اللعنة جرّاء استخدامه من قِبل بعض الإناث في مجتمعنا المصون - واللي برضه يحتل المركز الثاني عن جدارة واستحقاق في التحرش وسوء الاخلاق :)) - وتلك الجريمة كفيلة بوصمه بالعار وإلغائه من اللغة كلها.

لأ... مش عايزة اتجوز

انتي اتجننتي؟! دي سنة الحياة..

معندناش كلمة لأ معندناش "بنات" تقول لأ :) (لأ مش من واقع حياتي الشخصية اتبطّوا )

ماسورة لأ هتنفجر (اوعى وشك) :)

لأ... مش هعمل حاجة لمجرد انها هي كدة ومفيش نقاش

لأ... مش هسمح لحد يتدخل في حياتي ايّا كان من هو او هي.

لأ... هشغل مخي ومش هقبل بمسلمات.

لأ.... مش من حق اي حد يتحكم غير في حياته هو بس.

لأ... مش هعمل الا اللي يرضي ضميري ويريح روحي.

لأ... مش هسكت لمتحرش وهطلع عين امه هو واللي هيبررله.

لأ... الجواز مش سُنة الحياة الارض خلاص اتعمّرت واتخربت .

لأ... مش من حق حد يحكم على حد من مظهره او بسبب تصرف مش على هوى الباشا أو الهانم .

لأ... انت مش اللي مسئول عن التأكيد عن تنفيذ تعاليم الله على الأرض ، انت كمان هتتحاسب زي اي حد . اه والنيعمة .. بص/ بصي لنفسك في المراية وقولوا ورايا.. انا مش نبي انا مش نبي ..

لأ ... انت مش الصح المطلق لأن مفيش صح مطلق وكلنا بشر وآسفة لو صدمت حد اصل احنا بشر وكدزة عادي :))

لأ... مش كل واحدة نفسها تعيش حرة أو تستقل بحياتها او بتنادي بحرية المرأة تبقى عاوزة تلبس كل الستات بكيني .. روح اتعالج وتعالى نتكلم :)

لأ... كلمة التحرش مش كلمة أبيحة .. الفعل هو اللي أبيح . وآسفة لو صدمتك برضه :))

لأ... وأد البنات منتهاش ولا حاجة اشكال الوأد كتير وكفاية الوأد الفكري ده انيل من الدفن في التراب بكتير.. اه والمصحف... (هيسيبوا الجملة ويقولك الحلفان بغير الله لا يجوز.. لأ مبحلفش هو تعبير بيتقال كدة ومقصدش من وراه حلفان يا سيدنا/ ستنا الشيخ/ة) :))

لأ.... البنت اللي بشعرها مش رخيصة وحقيقي مش نازلة عشان تلفت نظر معاليك ولا انت في دماغها اصلا وكونك مبتعرفش تفرق بين البنات اللي كدة والبنات اللي كدة دي عيبة في حقك سيدي اللي مقطع السمكة وواكل ديلها يا مطرقع يا طعم يا نايتي.

لأ... البنت اللي قلعت الحجاب مش زنديقة ومسابتش الملّة وهي حرة ثم ان مالك امك اساسّا :))

لأ... البنت اللي بتشرب سجاير مش بالضرورة اخلاقها وحشة .. ممكن لو دورت تكتشف ان كان ليك قريبة او جدة بتدخن :)) شوف حكمة ربنا يامؤمن :))

نكتفي بهذا القدر الآن :)) ومش آسفة لو صدمت مشاعر مرهفة :))

واه .. لأ برضه مش كل اللي بكتبه هنا حاجات شخصية يا عم كولومبس :))

تو بي كونتينود :))) يعني في جزء تاني وكدزة :))