لا للسوسو ... ضد السوسو

التحرش: ألا هو يطلع ايه التحرش ده؟!
التحرش في ويكيبيديا 

هو مُضايقة، تحرش، أو فعل غير مرحب به من النوع الجنسي. يتضمن مجموعة من الأفعال من الانتهاكات البسيطة إلى المضايقات الجادة التي من الممكن أن تتضمن التلفظ بتلميحات جنسية أو إباحية، وصولا إلى النشاطات الجنسية، ويعتبر التحرش الجنسي فعلا مشيناً بكل المقاييس.

التحرش الجنسي يعتبر شكل من أشكال التفرقة العنصرية الغير شرعية، وهو شكل من أشكال الإيذاء الجسدي (الجنسي والنفسي) والإستئساد على الغير.

ويعرف المركز المصري لحقوق المرأة التحرش الجنسي بأنه " كل سلوك غير لائق له طبيعة جنسية يضايق المرأة أو يعطيها إحساسا بعدم الأمان "

بس مش دي المشكلة ولا ده اللي عاوزة اتكلم فيه :)

في ناس بتعتبر كلمة تحرش كلمة "ابيحة" عيب يعني بس "الفعل" نفسه عادي جدا بقا شئ متأصل في المجتمع المصري المتدين بطبعه أوي بقا... يعني عادي انك تمري بكل اللي فات فوق ده بس اللي مش عادي انك تقولي أو تاخدي موقف عشان "عيب" او "ميجرالكيش حاجة" ده على اساس ان اللي بيتحرش ده لاعبك سيجا! أو لسة معملكيش حاجة أو آذاكي اساسًا!

ماما .. محسن.. مدحت... الحقني في واحد حيوان اتحرش بيا 

عيب يابنتي "الكلمة" دي 

احساسك ايه بقا .. اهانتك.. جرحك.... مش مهم .. المهم ان الكلمة "عيب"

وبناءً عليه قررت الآتي

بلاش نقول تحرش يا بنات .. تعالو نلاقي اسم شيك وميخدش حياء مجتمعنا صاحب المركز الثاني عالميًا في التحرش .. اووه سوري قولت تحرش :) 

خلاص خلاص ... انا هسميه "سوسو"

ماما ... محسن.. مدحت... باكينام... انا "اتسوسو" بيا امبارح .. واحد حيوان "اتسوسو" بيا ... كان نفسي اعمله محضر "سوسو" في القسم 

قولو بقا ان كلمة "سوسو" عيب

العيب عيب .. ومهما كان الاسم فهو بياخد صفة "العيب" من الفعل نفسه

وبدل لما تلوم حد يكلمك عن التحرش انه قال كلمة تحرش وانتا شايفها عيب 

فروح من باب اولى امنع اللي بيرتكب الفعل "العيب" ومتلومش الضحية 

امنع "السوسو" أو عالأقل متنشرش سلبيتك في اللي حواليك 

لا للسوسو ... ضد السوسو ... معًا لمجتمع خال من "السوسو"

صوابع في حياة المصريين (محاولة لعد الصوابع )

تعدد وتباين المصريون في استخدام اصابعهم وابتكروا استخدامات منها البذئ ومنها ما يتم أكله ..
وظهر في حياتهم صوابع أثرت فيهم فاستخدموا اصابعهم حسب الاتجاه السياسي مرة وحسب اتجاه مشاوريهم مرة وحسب كتاب ابلة نظيرة بتاع الاكل مرات كتير اوي بقا :)

اترفع في وشهم صوابع كتير واتقال على بلدهم ان فيها صوابع كتير بتلعب برضه زي القول المأثور لخالد الذكر المقلوب مورسي ..

مش هكتب كتير انا هكتب عناوين بس محاولة مني لعد شوية صوابع أثرت وتأثرت بيها مصر والمصريين .. صوابع الاشارات لزوم الميكروباصات 
صوابع المحشي المقدسة عند المصريين ، صوابع زينب لزوم التحلية 
صباع الفنجري وصباع مرسي وصباع موباريك وصباع احمد عز وصباع جمال موباريك .. تمثال ابراهيم باشا أبو اصبع واللي ناس كتير عارفين ان اسمه ابو اصبع ونادرا ما بيقولو عليه ابراهيم
صوابع اشارة النصر ... صوابع رابعة ... حتى الدلتا بيشكلها فرعين على شكل صباعين صباع دمياط وصباع رشيد :)
صوابع الكفتة ... صورة الصوابع بعد الخطوبة اللي بيبان فيها الدبل 
صورة الصوابع المغموسة في الحبر بعد الانتخابات .. الاصابع الفسفورية 
والمقولة الشهيرة في كل المدارس المصرية ولكل الاجيال: اللي يعرف الاجابة يرفع صباعه.... الـ 3 صوابع المشهورة لمعشوق المصريين الكينج محمد منير :) .. صباع المقلوب المهندس محمد مرسي عيسى العياط اللي كان بيهددنا بيه على طريقة علمهم الأدب وربيلهم الشنب وزعقلهم وهددهم بصباعك يمكن يتعظوا 
وفي سياق شعبي "الاكل تحفة تاكل (صوابعك) وراه "
ومن اشهر الصوابع برضه صباع موباريك وهو بيلعب في مناخيره :D يالهوي دي مصر شافت كتير :))
وأخيرًا: صباع الواد الغتت اللي كان بيشاور عليك لما المدرس يقوله مين اللي كان بيتكلم وانا برة الفصل :D