قشر البندق والدهب القشرة

الرائع حميد الشاعري قبل حادثة فيلم أيظن :) اللي اتمنى من الله ان يكون عاد عوداً حميداً إلى رشده 

كان ليه اغنية وفيلم مشهورين بأسم قشر البندق

الاغنية كانت بتقول آه قلب البندق آه لا قشر البندق لآ قلب البندق حبوه آأأأأاهوووه قشر البندق يرموه أأأأأأؤووه 

اغنية بتصيبنى بالبهجة مكنتش بفهم الفيلم لما كان بيتذاع وانا صغيرة بس كنت بحبه :) ولما كبرت بطلو يذيعوه وللأسف بقوا بيذيعوا مكانه أيظن !!! 

بالنسبة للدهب القشرة او الصيني اللي زي كل حاجة في حياتنا مبهر و لامع من بعيد وبيخدع الناس بس هو في حقيقته فالصو رخيص  

اتعودنا نستبدل في حياتنا الحاجات اللي بتلمع اللي بتجذب الناس اللي بتديهم صورة انك واد محصلتش بغض النظر عن قلب البندقة 

بتخلي مشاعرك قشرة احساسك قشرة كلامك قشرة عشان تعرف تعيش وسط الناس القشرة في الحياة القشرة 

بقيت انتا نفسك قشرة وفرز تاني كمان تيجي على نفسك عشان ده وتنافق في ده وتجامل ده عشان حسابات حياتية بحتة 

بس بيجي عليك الوقت اللي مبتعرفش تتخلى عن القشرة اللي انتا جواها 

ياريت القشرة دي تكون حماية للحاجات الحلوة اللي جواك يعني تحافظ على قلب البندقة من الكسر ومتخسرهوش  وده الفرق بين قشرة البندق والدهب القشرة قشرة البندق بتحافظ على قلب البندقة وطعمها بتحفظ حاجة حلوة يعني لكن الدهب القشرة فقشرته مجرد حاجة بتدي لمعة زائفة لمعدن رخيص

قلبك لو سليم هتعدي متبقاش من جوة وبرة فالصو او متخليش الفالصو يبهت على قلب البندقة

الناس لما بتشتري الدهب القشرة بتشتريه عشان لمعته اللي أول ما بتبهت بيترمي وبيتجاب غيره 

متسمحش لنفسك تستخبى جوة قشرة ليها وقت وتبهت خليك اصلي متبهتش مهما حصل الناس هتشتريك بالغالي وهتقدر قيمتك عشان عارفة انك غالي ولمعتك فيك طول العمر وانتا كمان هتبقى عارف ان الناس دي تعبت عشان تكسبك 

الناس بطلت تدور على قلب البندق عشان التدوير بياخد وقت وبتستسهل وتاخد القشرة دلوقتي متكونش منهم ولو لاقيت حد كويس مش مجرد قشرة بتلمع امسك فيه مهما تعبت عشان توصله الغالي تمنه فيه 

اسفة اني وصلت المعنى بأسلوب مادي بس فعلا الناس دلوقتي بقت بتتفاهم بالماديات  اكتر من قلب البندق

احيه ..طب نعمل ايه !!!

هو في ايه بالظبط البنات تعمل ايه يعني عشان تعرف تعيش !! تحرش .. تحرش Every where 
بكل الطرق وبكل الوسائل نعملكو ايه يا ولاد التيت نروح منكم فين يا شوية .... تيت برضه لان مفيش لفظ على مستوى قذارة الانسان المتحرش
بس العيب مش عليهم العيب عاللي مرباهمش اه متربوش اتسابو للنت والشارع يعلمهم ويربيهم تحت بند الولد ميتخافش عليه عيالكم طلعوا تربية شوارع يا افندية وقرفهم بيطلع عالناس ستات بنات جدات ورجالة كمان هو انتا فاكر ان ابنك لما الشارع يربيه هيطلع متحرش بس؟ هع هيطلع قليل الادب ومعندهوش احساس ولا مبادئ ماشي بقانون الشارع زي ما بيفرض سخافة دم اللي خلفوه عالبنات في الشارع  سواء في مترو ولا اتوبيس او حتى في الموبايل او عالنت في الفيس بوك وللا تويتر في نفس الوقت بيقل ادبه عاللي اكبر منه في السن وهيجي اليوم اللي يقل ادبه عليك وابقى افرح بتربية الشارع لابنك
اللي هيقوللي لبس البنات ومش عارفة ايه هقوله وانتا شايف نفسك اصلا في موقع يسمحلك بانك تحاسب او تعاقب البنت اللي من وجهة نظرك بانك تتحرش بيها او حتى تبرر التحرش بيها ؟!! دانتا مش بعيد تكون جدتك الله يرحمها لو عايشة او اتوفت لبست في فترة من حياتها ميكرو جيب او كانت بتشرب سجاير يعني بمفهوم معاليك منحرفة وتستاهل التحرش بيها ، احنا نص جيل امهاتنا متحجبوش قبل سن العشرين او بعد ما اتجوزو وخلفوا كمان هات صور الحاجة وشوفها بعدين اتكلم يا ننوس 
فكك عشان اصلا بنت عمي منتقبة واتحرشوا بيها برضه ياراجل دانا امي الست اللي المفروض كبيرة بيعاكسوها .. طب سمعت عن حادثة اغتصاب ست عندها حاجة وتمانين سنة في المقابر من حوالي كام سنة ؟!! الحادثة دي انا فاكراها كويس طب والنبي ايه المبرر؟ 
طب بلاش ... ايه سبب التحرش عالموبايل يعني قعدت في بيتنا جالي التحرش دليفري ... اريد حلاً سمعت كلامكو وقعدت في البيت اتحرشوا بيا عالموبايل .. طب شافني فين ... طب ايه السبب؟!! ولا بلوك نافع ولا تشريد نافع نعمل ايه؟ خطوط الموبايل ارخص من كانز البيبسي وبتتباع عالرصيف ومن غير سامي واقفشني لو تقدر شكراً!!!!
ومن ساعة ما زفت الطين مارك فتح الرسايل عالفيس بوك وكل وقت والتاني الاقي رسايل من نوعية ممكن نتعرف واشكال شمال معذور الراجل ميعرفش القرف اللي في مجتمعنا المحافظ المتدين ابو العيون الجريئة اللي عاوزة تتدب فيها رصاصة لا مش رصاصة دانة مدفع ... ايه الحل ؟!! 
نقعد الستات في البيت ونخلص من الفتنة؟ طب ياحج مافي بلاد عملت كدة وعلى رأسها افغانستان والحمد لله مركز اول في التحرش وزواج الغلمان لمؤاخذة ... في الحالة الهباب اللي وصلنالها لو الستات قعدت في البيت الرجالة هيتم التحرش بيهم اه والله ... شكلك مش مصدق ... من كام يوم صفحة نشرت رسالة واحد تم التحرش بيه من سواق تاكسي ... اتصدمت وعرفت بقا اننا مش بس حققنا المركز التاني في التحرش على مستوى العالم لا دا احنا كمان ابتدينا نتحرك نحو تحقيقة بس المرة دي في التحرش بالذكور برضه .. يعني مسيرك يا ملوخية تيجي تحت المخرطة وساعتها هنقول عليك ايه اللي لبسك يابنى تيشيرت بينك وللا البنطلون دة محزق وللا كمان ممكن نقولك مانتا اللي مشيتك مش مظبوطة :) ياااه ..لا بعد الشر عليكو ربنا ما يوريكو الاحساس ده احنا منرضاهوش برضه 
المجتمع لازم ينبذ الاشكال الشمال اللي فيه عشان ينضف التحرش مش بس بالبنات في تحرش بالاطفال ذكور واناث طب ايه مبرره ده بقا؟ 
.ياباشا جرب عدي من قدام جنينة الاورمان فيها امن مركزي هات اختك ولبسها انشاللا نقاب وعديها قدامك واسمعهم وهما بيتحرشوا بيها او حتى قدام اي مديرية امن زي القاهرة مثلا كدة عدي انتا وخطيبتك او مراتك او اختك او امك وطلعني كدابة وقول لا محدش اتحرش بيهم .ولو اتحرشوا بيهم قول بقا اصل اختى مكانتش لابسة عدل او امي حجابها مش مظبوط.. المرض اتفشى اللي المفروض يحيمنا بيتحرش بينا ... احنا في قاع الحضيض ... انا قرفانة ومفيش كلام يوصف القرف مليون قناه دينية قال يعني دينية بلا قرف شيوخ عيرة دة الواحد يخاف ينصح الشباب يسمعولهم لاخلاقهم تبوظ ... مفيش قدوة سيدي .... ميت مسجد وكنيسة بيتبنوا كل يوم والاخلاق في الحضيض كل يوم ... مين المسئول .. وفين الحل ... والاهم فين القدوة؟
كلمة اخيرة للمتحرشين ... انضفوا بقا مليتوا البلد 
وكلمة اخيرة للمتضامنين معاهم ... استنى ياخويا دورك لما يتحرشوا بيك انتا كمان وساعتها هفرح فيك واقولك ايه اللي خلاك تعمل شعرك سبايكي وترش آكس ياجدع :P

خليك اتحرش زي التور بكرة هيجي عليك الدور

رجع الرحمة لقلبك تاني (موضوع مقطقط لأصحاب القلوب الرحيمة فقط )

انا ماشاء الله ماشاء الله عندي 5 قطط قمرات وبحبهم وده الموضوع اللي حابة اني اتكلم فيه النهاردة واللي بالمناسبة مش شايفاه تافه
انا مش احسن انسانة في الدنيا ومش هقول انى مدلعاهم وبأكلهم احسن اكل بس اللي متأكدة منه انى بحبهم وحنينة عليهم ورحيمة بيهم على قد ما بقدر مرة قطتى واللي بالمناسبة اسمها مرزوقة وبندلعها ونقولها يا زوقة :) ، كل قطة عندي اتولدت على ايدي واول نيو انا اللي سمعتها لا انا مش تافهة مخلوقات ضعيفة بتتولد قدامك وبتراعيهم وتهتم بيهم وبيكبروا قدامك بيخافو عليك لو تعبت ويستنوك لما ترجع من برة، ينامو في حضنك، يلعبو معاك، يقطعولك فرش البيت عشان بيسنوا ضوافرهم، يقلبولك باسكت الزبالة، يعملو عصابة سطو مسلح لفتح الفرن الصغنن اللي في المطبخ ميمو هو الفتاحة وزوقة ناضورجي ولولو هو اللي بياخد الشبشب :) لا بهزر بس اللي بيتفقش بيتنفخ ومع بصة بريئة منهم بتنسي المصيبة وتتحول لعيل صغير بتلعب لو جواك بلاوى الدنيا :)، ده غير لما يبقوا نايمين ومختفيين ومش باينين ومع صوت فتحة باب التلاجة يتجمعوا من حيث لا ادري ولما متتهناش على اكلة الا ويشاركوك فيها :)
امي رجلها لما اتكسرت ميمو كان وراها وبيقعد على رجلها وملازمها دايما ولحد دلوقتي بينام فوق راسها ومتعلق بيها جدا، لما بتكون مربي قطط زي حالاتي او اى حيوان قلبك بيرق واحساسك بيبقى مرهف بتمشي بتحس بقطط الشارع وبيبقى نفسك تاخدهم  معاك البيت واول ما تروح بيتك بتاخد قططك في حضنك عشان وحشوك وعشان كمان بتقول من جواك يارب مايوريني حاجة وحشة فيهم زي اللي بشوفها في قطط برة ، انا مش اوفر هشرحلكم وشوفوا واحكموا كلامي صح وللا غلط
زوقة حبيبتى واللي بالمناسبة عندها 4 سنين :) قطة شيرازي سودا وقمر بالمناسبة لما اتولدت امى كانت بتخاف منها وكل الناس اخدو منها موقف نظام قطة سودا وكدة كل اصحابي وحتى خطيبي ايه ده دي سودا اقولهم ايه يعني مش خلقة ربنا؟ طيبة جدا وحنينة جدا وجميلة جدا جدا جدا زوقة تعبت جالها مشكلة في الكلى كانت بتعمل بول فيه دم المهم مكدبتش خبر وكلمت دكتور عظيم اسمه دكتور محمود حمدي وروحت العيادة انا وزوقة وخطيبي اللي كان مبيحبش القطط وبالاخص زوقة ولما شافهم واتعامل معاهم اتغيرت نظرته لمرزوقة وللقطط كلها :) اي حد زارنا في في بيتنا وشاف عيلتي القططية حب القطط حتى صاحبتيني امل وايمان حبو القطط ومبقوش يخافوا منهم ... طبعا لما روحت للدكتور ناس كتير اتريقت قطة وهتوديها للدكتور دة البنى آدمين مبيروحوش ياختي على ايه وكلام فاضي من ده لما اسلام راح معايا وشاف العيادة قد ايه نضيفة وقد ايه الدكتور مهتم ورحيم وعنده ضمير وان مش لوحدى الـ(مجنونة) اللي بتحب قططها وبتعاملهم زي الاطفال وبتكلمهم كأنهم ولادها!! الحقيقة شاف اجن مني وحمد ربنا عالنعمة اللي هو فيها :)
ودلوقتي لولو هو كمان تعب ولما كتبت عالفيس انه تعبان ضحكو واتريقوا عليا ...
ايه ياجماعة هي دي مش روح؟ مش مسئولية قدام ربنا ؟ هتقولو هو في رفق بالانسان عشان يبقى في رفق بالحيوان؟
هقولك ان لازم يبقى في رفق في الحيوان عشان يبقى في رفق بالانسان
انتا لو آذيت روح ضعيفة قطة بقا كلب ارنب عصفورة قلبك هيطاوعك تأذي انسان او عالاقل متتأثرش لو شوفته مقتول سواء مدبوح او مشنوق او محروق او متشرد او جعان او اي حاجة انتا مبترفقش بالانسان اللي زيك عاوز ايه يعني تأمرون الناس بالبر وتنسون انفسكم؟ ايه المشكلة انك ترفق بالاتنين ! اللي تقدر ترفق بيه ارفق لو مش قادر يبقى مالكش دعوة بحد.
هديك امثلة توضحلك قصدي ايه ..
لما يبقى عندك عيال وتمشي تشوف طفل متعور او متشرد بيجي في بالك عيالك ونظرتك بتتغير للاطفال بمعنى اصح قلبك بيرق من ناحيتهم بتحس بجمال الاطفال ونعمتهم وهكذا...
القصد ... ارحم تُرحم ... ترحم انسان حيوان بقا مش فارقة المهم تكون رحيم
لو مفرقش معاك منظر قطة ميتة مش هيفرق معاك منظر انسان مقتول 
لما تربي حيوان او حتى نبات وتهتم بيه هتبقى بينك وبينه علاقة روحية خاصة متتقدرش بتمن هتستحمل منهم اي حاجة حتى لو عملو بيبي على سريرك او صحيت من نومك عشان معاد ادوية قطتك كلها كل 12 ساعة وبين كل دوا ودوا نص ساعة يعني مش هتنام بس كل التعب هيروح اول ماتحس ان تعبك جاب نتيجة احساس اول صوت من مخلوق بيتولد على ايدك وبتراعيه وبيكبر قدامك ويجري عليك يونسك وانت بتذاكر او يغتت عليك وانتا نايم وتقوم تلعب معاه وتنام مبسوط :)
الرحمة مبتتجزأش مينفعش تبقى رحيم مع انسان من غير ما ترحم حيوان 
تربية الحيوانات وانك تراعي ربنا فيهم غير الحسنات هتستفيد منها في حياتك هتبص للدنيا بنظرة مختلفة هتبقى حنين ورحيم :)
خلي معاك علبة نستو طعمة ب 3 جنية مش هيخس عليك بحاجة لو قابت في طريقك قطة صغيرة جعانة اديتها مثلث .. خليك رحيم يا أخي :)
وعلى فكرة الدكتور اللي ذكرت اسمه بيعالج قطط وكلاب الشوارع ببلاش وانقذ قطط وكلاب كتير من الموت ربنا يجازيه خير ومعاه دكاترة تانيين عظماء برضه الانسانية لسة بخير :)

ياتعلموهم كويس يا توفرولهم الكولة

انتا كطفل مصري قدامك 5 انواع من المدارس وفي بعض الاحيان التعليم من حيث الجودة واحيانا النوعية مدرسة حكومية شعبية مهلبيةو مدرسة خاصة  و مدرسة تجريبية ومدارس لغات و مدرسة انترناشونالية ودي بتاعة العيال ولود الاغنيا اللي ليهم اهالي مهميييييييين :) ، النموذج الاول بيدرسولك منهج بس متتكلمش عن الجودة المدرس يدخل يشرح او ميشرحش حسب الغزالة ، كدة كدة مرتبه ماشي ودروسه ماشية برضه والشهادة لله اصلا كدة كدة المرتب ميشجعش ولا يفتح النفس ولا البيت وعشان يقلل من معاناة ولاده واللي بيعمله في ولاد الناس ميطلعش عليه هو وعياله غالباً ما بيوديهم مدارس لغات :) ولكن هيهاااات لازمن في مرحلة ما هتديهم دروس برضه يا معلم :)اما عن ولاد الغلابة اللي معمولهم التعليم المجانى واللي للأسف عشان مجاني فإنساني :) فالعيال دي في نطاق القاهرة والجيزة غالبا ما بتنط من فوق السور ومبيكملوش الألش بتاع اليوم الدراسي فاللعب افيدلهم واستغلال الوقت في لعب البلاي ستيشن افضل بكثير من ان يتنكد عليك عشان معكش تمن الدرس او المجموعة ، اما بقا عن باقي المحافظات وخاصة محافظات الوجه القبلي فحدث ولا حرج ، شخصياً اعرف ناس سابت التعليم عشان مبياخدوش حاجة ومبيستفيدوش اى حاجة فالشغل افيد عالأقل بتاخد فلوس 

نيجي بقا للمدارس الخاصة وهي افضل حالاً من المدارس الحكومية عن نفسي كنت فيها لحد اعدادي نفس المنهج مع امكانية اضافة لغة تانية في اولى اعدادي واللي غالبا ما كانت حصة اللغة التانية بتتاخد من مدرسين المواد الاساسية الأهم حتى حصة تحفيظ القرآن وحياتك كانت بتتاخد دة غير حصص الألعاب والدين والرسم ومكنش في موسيقى :) وبالنوسبة لمعمل العلوم فكان ميمنوع على الطلب لمس اياتوها آداه :)  وكان المطلوب من الطفل انه كل يوم ياخد مواد اساسية وحصص اضافية وسلملي على كل القوانين الادارة كانت عاملة كارت ارهاب للطلبة والمدرسين على التوازي فكانت الادارة تكدر المدرسين وبالتالي يكدر المدرسين الطلبة نازلين تكدير في بعض ، الحقيقة مدرستى كان يطلق عليها اسلامية :) اه حصص التحفيظ والدين بتتاخد لحساب حصص تانية شايفينها اهم بس مش مشكلة هي اسلامية برضه لجر رجل الزبون :) ضغط على اعصاب الاطفال وحفظ وتسميع وامتحانات مفاجأة تخلي الطفل نواه  احفورية ممتازة لطالب وحيد الخلية وهي خلية الحفظ مفيش ولا ابداع لأن حصص الرسم وهي النشاط الابداعي الوحيد عشان الموسيقى مش موجودة بتتاخد والالعاب وهب المتنفس الوحيد بتتاخد برضه فانت كدة يا معلم مبروك عليك علمت ابنك وعقدته في نفس ذات الوقت ، دة غير التصنيف الانتقائي للطلبة حسب المستوى الدراسي  والذي يجعل (حسب تجربتى) من الاطفال ذات المستوى الأعلى كائنات بيضوحباطية ممتازة ذات ميول ديناصورية (بيور) يعني صافية :)

التجريبية بيزودوا فيها مواد بالانجليزي وغير كدة  معرفش :) الانترناشونال بقا دي ربنا يوعدنا بيها مناهج اييييييه وتدريس ايييييييه شغل فنادق :) 

ودة الفرق في الفرص بينك وبين غيرك وفقاً لمبدأ بفلوسك وبمالك هتنول اللي في بالك :) 

مش هحلم ان تتساوى فرص الحصول على تعليم جودتة عالية عالأقل نقلل الفجوة 

ده غير اننا في زمن اصبحت فيه المطواه هي سلاح التلميذ