في حاجة عندنا في الجغرافيا مكنتش اعرف انها موجودة في مجالات تانية اسمها Birds Eye View .. لأ مش شركة انتاج مسلسل الكبير اوي :) ، هي انك تشوف الحاجة بنظرة عين الطائر يعني من فوووووووووووق اوي هتلاقي الدنيا كبيرة اوي وانتا نقطة ده ان ظهرت ... عمرك فكرت تطلع من نفسك وتبص على نفسك وكأنك شخص تاني؟
تفتكر هتشوف نفسك ازاى؟ وسيم.. ذكي... غبي... تخينة .... جميلة... رفيعة شوية ... بطلو بقا تفكروا في الشكليات كل حاجة شكليات
اهو الاهتمام بالشكليات ده خلانا من كتر ما اهتمينا باللي برة نسينا اللي جوة او خلانا نفتكر ان اللي برة بيبهت عاللي جوة.. ابسلوتلي :) جربت تبص على نفسك من جوة؟ تبص على روحك بعيدا عن اي حاجة في حياتك تنسلخ عن واقعك ومشاكلك .. انتا ونفسك وبس تتكلم معاها تشوف انتا ظالمها وللا هي اللي ظلماك ؟ تعاتبها وتعاتبك .... وسط السباق اليومي اللي في حياتنا بننسى نفسنا فبتخاصمنا وبتكرهنا وبتنسانا .. لازم نركن على جنب شوية ونشوف ايه اخبارها ياتري غلطنا فيها وللا هي اللي غلطت خليها بمزاجك احسن ما يجي عليك الوقت اللي تقعد غصب عنك تحاسبك وتحاسبها ...
ثوابت بتتغير وافكار بتتغير كل يوم وصدمات ومفاجآت وحوارات وحاجات مكلكعة .. دوشة
الدوشة بتقصر العمر وبتأثر فيه كمان .. تخيل عمرك يضيع في شوية دوشة !!!
هتندهش من قعدتك مع نفسك هتلاقيك عملت حاجات مخدتش بالك من تأثيرها عليك وفي حياتك لو سلبية هتبقى حريص متتكررش ولو ايجابية هتبقى حريص انك تستمتع بيها مدة اطول لو اتكررت تاني وتعرف قيمتها
ناس بتقابلهم ياترى أثروا فيك ازاي ضافولك وللا اخدو منك؟ قدروك وللا !! صانوك وللا جرحوا فيك..! حبوك وللا كنت مرحلة! غيروك للاحسن وللا للأسوأ؟ انتا كمان ضفتيلهم وللا اخدت منهم بس؟ قدرتهم وللا لأ؟ غلطت فيهم؟ حبيتهم؟ اخلصت ليهم؟ (بتكلم عن العلاقات الانسانية القريبة مش عم عبدو البقال مثلا)
هتطلع بنتائج هتعرف ظالم نفسك وللا مظلوم ... هي اللي مدايناك وللا انتا اللي مداينها
حقك على نفسك وللا نفسك اللي حقها عليك
متظلمش نفسك ومتجيش عليها هتعرف انك غلطان وهتندم وساعتها هتنتهز هي الفرصة وتسود عليك عيشتك
بتوجع اوي انك تيجي على نفسك اوي وتكتشف ان كل ده طار في الهوا شاشي
حب نفسك لو لقيتها تستاهل .. ومتخليش حبك ليها يخليك تظلم او تيجي على حد خليك في السليم
مش عارف حاسة ان كلامي متفلسف زيادة بس مش مشكلة اصله عاجبنى :)
اهو ابتديت احاسب نفسي اهون اقعدوا بالعافية بقا عشان الحق اقعد مع نفسي شوية :)
